Momente paniku janë përjetuar të enjten paradite në Aeroportin Ndërkombëtar “Eleftherios Venizelos” të Athinës, kur një avion me 150 pasagjerë në bord u detyrua të bëjë një ulje emergjente për shkak të tymit në kabinën e pilotëve.
Ngjarja ndodhi më 19 qershor, pak para orës 11:00, kur piloti i një fluturimi Airbus A319 që sapo ishte ngritur nga aeroporti i Athinës, kontaktoi menjëherë kullën e kontrollit dhe kërkoi një pistë emergjente për ulje. Shkak për alarmin u bë një sinjal “Emergjencë e plotë” që u aktivizua menjëherë pas ngritjes, pasi në kabinën e pilotëve u raportuan shenja tymi.
Avioni, që kishte destinacion Rigën e Letonisë, u detyrua të devijojë kursin mbi Detin Egje dhe të rikthehej në aeroportin e nisjes, në Spatë. Fluturimi ishte operuar nga kompania çarter Carpatair, në emër të kompanisë baltike airBaltic me kodin BT6162.
Zjarrfikësit u vendosën menjëherë në pistë si masë sigurie, por për fat të mirë nuk pati nevojë për ndërhyrje, pasi avioni u ul në mënyrë të sigurt në një pistë ndihmëse. Sipas raportimeve, të gjithë pasagjerët janë në gjendje të mirë shëndetësore dhe procesi i evakuimit u krye pa incidente.
Avioni pritet t’i nënshtrohet një inspektimi të hollësishëm nga teknikët e kompanisë për të përcaktuar shkakun e saktë të problemit. Ndërkohë, funksionimi i aeroportit është rikthyer në normalitet.
