Ermal Beqiri ka pajtuar një studio shumë të njohur franceze që të përballet me Gjykatën e Amiensit, me qëllim bllokimin e ekstradimit drejt Shqipërisë. Biznesmeni, i cili u arrestua në Francë teksa pilotonte një avion civil mbi centralin bërthamor të Penly-t (Seine-Maritime), sipas burimeve të besuara, është rezident në shtetin francez, çka mund ta shfrytëzojë si një argument për të bllokuar përballjen me drejtësinë në Shqipëri. Burimet konfirmojnë se ndërkohë në Shqipëri është një tjetër studio avokatore, që po përcjell materialet hetimore paralelisht me ato të SPAK.
Ende nuk ka konfirmim zyrtar nëse Beqiri do të bëjë kërkesë për azil politik në Francë, aty ku rezulton se ka themeluar edhe kompani prej disa vitesh, ndërsa ka blerë pasuri në miliona euro, përfshirë dhe një kështjellë, që tashmë janë sekuestruar.
Beqiri akuzohet se, bashkë me Ergys Agasin, krijuan dhe drejtuan një grup kriminal në Agjencinë Kombëtare të Shoqërisë së Informacionit, ku fitoi miliona euro tendera me kompaninë e tij.
Ai dyshohet se për kryerjen e veprave penale “Konkurrenca e paligjshme nëpërmjet dhunës”, “Heqja e paligjshme e lirisë”, “Shkelja e barazisë së pjesëmarrësve në tendera apo ankande publike”, e kryer në formën e veçantë të bashkëpunimit, atë të grupit të strukturuar kriminal, dhe “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, si dhe “Pastrimi i produkteve të veprës penale ose veprimtarisë kriminale”, si dhe “Korrupsioni aktiv i personave që ushtrojnë funksione publike”, të kryer në bashkëpunim, më shumë se një herë.
