Prokuroria e Tiranës do të kryejë një eksperiment të dytë hetimor lidhur me vrasjen e biznesmenit Eduart Reçi, krim për të cilin dyshohen dhe janë vënë në pranga vëllezërit, Shkëlqim e Florian Dukaj. Burime pranë prokurorisë thanë se eksperimenti do të përcaktojë se sa kohë i është dashur autorit të dyshuar të zbresë nga shkallët e emergjencës së hotelit në zonë të ndjekë tunelin e fshehtë dhe të dalë tek banaku i lokalit në pronësi të tij. Sepse nga hetimet e para, prokuroria dyshon se Shkëlqim Dukaj, oficer gjyqësor i komisariatit nr. 2 në Tiranë pasi qëlloi për vdekje biznesmenin u largua përmes një tuneli duke iu shmangur fiksimit në pamjet e kamerave të sigurisë. Ndërsa vëllai i tij Florian Dukaj hidhte fishekzjarre që të shmangte zhurmën e armës në momentin kur Reçi u ekzekutua. Eduart Reci u qëllua me plumb në kokë dhe gjeti vdekjen më pas, teksa pinte cigare para pallatit që kishte ndërtuar vetë në zonë. Sipas prokurorisë vëllezërit e ekzekutuan biznesmenin për shkak të konflikteve për pronën, pasi ishte angazhuar për ndërtimin e një pallati.
