Në Gjykatën e Tiranës nisi procesi në mungesë ndaj Bledar Jambellit, i akuzuar si urdhërues i vrasjes së kryekomisar Artan Cukut. Gjyqi ndaj Jambellit është zvarritur prej vitesh, pasi dosja kaloi nga Krimet e Rënda te Gjykata e Tiranës, ndërsa disa gjyqtarë janë larguar për shkak të vettingut.
Artan Cuku u vra për shkak të detyrës, në derën e pallatit ku banonte, në rrugën e Kosovarëve, pasi gjatë kohës që drejtonte policinë e Vlorës kishte arrestuar Jambellin si të dyshuar për vrasje. Si ekzekutor i kryekomisarit është dënuar më herët me 10 vite burgim Mikel Shallari, i cili mban statusin e të penduarit të drejtësisë. Jambelli u arrestua në Greqi, por nuk u ekstradua drejt Shqipërisë. Ai rrezikon dënimin e përjetshëm.
