Prokuroria e Posaçme kundër Korrupsionit dhe Krimit të Organizuar (SPAK) ka paraqitur një kërkesë për gjykim ndaj Andri Mehjas, ish-kryeinspektor i Mbrojtjes së Territorit në Bashkinë Elbasan, i cili akuzohet për kryerjen e veprës penale "Korrupsion pasiv i personave që ushtrojnë funksione publike", sipas nenit 259/2 të Kodit Penal.
Hetimet e zhvilluara nga SPAK për procedimin penal nr. 92, të vitit 2024, kanë zbuluar se më 15 prill 2024, Mehja ka firmosur dy vendime administrative brenda të njëjtës ditë. Vendimi i parë, nr. 12, kishte të bënte me prishjen e një objekti të kundërligjshëm të ndërtuar nga shtetasi V.N. në fshatin “Katund i Ri”, njësia administrative Bradashesh, ndërsa vendimi i dytë, nr. 13, parashikonte një gjobë prej 500,000 lekësh për të njëjtin person.
Sipas hetimeve, më pas, Andri Mehja ka shfrytëzuar detyrën e tij për të kërkuar dhe marrë një përfitim të paligjshëm financiar prej 250,000 lekësh nga V.N., në këmbim të uljes së gjobës administrative nga 1,750,000 lekë në 500,000 lekë. Kjo sjellje është akuzuar si një akt korrupsioni pasiv, ku i pandehuri ka abuzuar me funksionin e tij për të përfituar para në mënyrë të paligjshme.
Kërkesa për gjykim është paraqitur pranë Gjykatës së Posaçme të Shkallës së Parë, dhe procesi do të vazhdojë në kuadër të hetimeve për luftën kundër korrupsionit në nivel të lartë.
