Kontrolli i Lartë i Shtetit është kthyer në shënjestër të qeverisë, pasi mesa duket po merr vendime që po i prishin terezinë.
Për ta kuptuar këtë mjafton të shohësh deklaratat e kreut të Komisionit të Ekonomisë, Eduard Shalsi, i cili caktohet nga Rama për të bërë avokatin i të gjithë vartësve që raportojnë në Komision. Pasi i doli në krah Guvernatorit të Bankës së Shqipërisë për skandalin e mikrokredive, e cila solli vetëvrasjen e dy personave, Shalsi mbrojti edhe AKU-në nga raporti i Kontrollit të Lartë të Shtetit.
Sot e kishte rradhën për ta mbrojtur zellshëm drejtoreshën e Buxhetit në Ministrinë e Financave, Mimoza Dhëmbin, ku KLSH e ka kapur në shkelje dhe ka kërkuar shkarkimin e saj. KLSH kishte kërkuar shkarkim nga detyra, pasi verifikimi që i bëri sistemit të Thesarit, nxori në pah se shpenzimet në vitin 2022 ishin 260 milionë euro më shumë se sa buxheti faktik në këtë vit, çfarë tregoi se Ministria e Financave ka mashtruar në raportin e deficitit buxhetor për vitin 2022.
Për këtë kreu i KLSH, Arben Shehu, si asnjëherë më parë është thirrur nga Shalsi 4 herë në Komisionin e Ekonomisë për të dhënë shpjegime për këtë rast. Ky përveçse është rast i paprecedent, është edhe njëlloj presioni që po i bëhej kreut të KLSH për raportin që institucioni që drejton kishte bërë.
Për më tepër po ju sjellim fjalën e Shalsit:
“Por, ne këtej na ka shqetësuar ky paragraf, me thënë të drejtën. Ka kolegë që ju njohin mirë, ka kolegë që nuk ju njohin mirë. Të lutem, shumë shkurtimisht një CV por sa më të përmbledhur të karrierës tënde.
Kur e keni lexuar këtë gjë, çfarë keni ndjerë? A ka patur ballafaqim, ka patur opinion, jeni njohur paraprakisht, ju është dhënë njoftimi, ka patur reagim? Domethënë, si jeni ndjerë?
Ne këtej, e kemi gjykuar që ishte e domosdoshme sepse kemi dëgjuar një paragraf nga mediat, ndërkohë që nuk po gjej një person, edhe nga opozita, qoftë edhe të vetëm, që mos të flasë për eksperiencën tuaj të gjatë. Dhe ne natyrisht na duhet të kuptojmë çfarë ka ndodhur. Ndjeheni e shqetësuar që jeni thërritur në Komision për të…apo ndjeheni më shumë e shqetësuar që në finale të gjithë kësaj karriere keni një paragraf të tillë”, u shpreh Shalsi mes të tjerash.
Në kërkesën që iu bë sot për të dhënë llogari për Mimoza Dhëmbin, kreu i KLSH refuzoi të përgjigjej. Arben Shehu tha se marrja në pyetje e tij krjonte precedentin që parlamenti ta thërriste për më shumë se 1500 punonjës të tjerë, që ishin gjetur në shkelje.
Por deklaratat e Shehut provokuan irritimin e socialistëve që e korrigjuan menjëherë. Ndërsa rasti i sotëm shërbeu për të vënë në dukje pikërisht atë që ky institucion ka mbetur jashtë urdhrave të pushtetit.
