Ashtu siç dhe pritej, Komisioni Hetimor për të dhënat e TIMS nuk prodhoi asnjë rezultat befasues. Kjo pasi në mbledhjen e fundit të këtij komisioni, PS dhe opozita kanë dy raporte të ndryshme.
Kjo u vu re edhe në rënien e entuziazmit që kishte në fillim të kryetarit të këtij Komisionit, Ervin Salianji i cili lexoi raportin, ku ndër të tjera duhej të pranonte që dështuan që të thërrisnin Edi Ramën dhe ish-ministrin Bledi Çuçi si dëshmitarë. Po ashtu në raportin e opozitës thuhet se edhe pse shumica e dëshmive nuk ishin sekret shtetërore, u desh të pranonin që dëshmitë të zhvilloheshin me dyer të mbyllura.
“Anëtarët e PS refuzuan të thërrisni Edi Ramën, megjithëse në dokumentacionin e administruar dhe dëshmitë e marra emri i tij u përmend. Po ashtu anëtarët e mazhorancës refuzuan të thërrisni ish ministrin e Brendshëm Bledar Cuci. Anëtarët e mazhorancës vendosën që dëshmitë të merreshin me dyer të mbyllura edhe pse në të shumtën e rasteve dëshmitë nuk përmbanin sekret shtetëror”, tha Salianji ndër të tjera.
Ndërsa përfaqësuesi i mazhorancës, Toni Gogu, tha se PS ka raportin e saj të përgatitur nga një grup tjetër ekspertësh.
“Nëse raporti që ju keni përgatitur është ajo që ju keni thënë gjatë gjithë veprimtarisë së komisionit do jetë raporti i pakicës. Ne kemi një tjetër raport të përgatitur nga një grup tjetër ekspertësh. Nëse doni ti hedhim në votim vazhdojmë. Nëse doni të lexoni raportin tuaj, vazhdoni, por duhet të votohet për të qenë raport i komisionit” – tha Gogu.
Kështu përfundon edhe ajo që u quajt fitore e madhe e opozitës kur pas 8 muajsh betejë në Parlament me zhurma dhe jo aktivitet normal, përfunduan me dy Komisioni Hetimore që nuk prodhuan asgjë përveç retorikave të zakonshme politike. Për të mos përjashtuar edhe variantin tjetër që ky Komision përfundoi ashtu siç ishte planifikuar, për të justifikuar shuarjen e aksionit opozitar në Parlament dhe për të kamufluar një pazar të fshehet mes shefave të të dyja palëve.
