Është quajtur “minerali i momentit”. Miliona njerëz në mbarë botën po marrin magnez për një sërë arsyesh: për gjumin, tretjen apo për qetësimin mendor. Në botën gjithnjë e më dinamike të suplementeve ushqimore, duket se ka ardhur koha që magnezi të shkëlqejë. Industria po lulëzon. Tregu global i magnezit vlerësohet rreth 3 miliardë paund, dhe pritet të dyfishohet në dekadën e ardhshme.
Në një fabrikë të vogël në Yorkshire Dales të Britanisë, fuçi të mëdha me pluhur të bardhë – magnez citrat – mbushin hapësirën përkrah makinerive që punojnë pa pushim. Punonjësit, të veshur me veshje mbrojtëse, matin me kujdes sasinë e mineralit që më pas futet në makina për prodhimin e miliona tabletave çdo ditë.
“E dërgojmë magnezin tonë në mbarë botën – në Australi, Azi, madje edhe në Lindjen e Mesme,” shpjegon Andrew Goring, drejtor i kompanisë “Lonsdale Health”. “Kërkesa po rritet çdo vit. Është një nga produktet tona më të shitura.”
Por a kemi me të vërtetë nevojë për të? Dhe pse pikërisht tani është bërë kaq i famshëm?
"Influencuesit dhe rrjetet sociale kanë bërë të vetën,” shton Goring. “Magnezi ka qenë gjithmonë i rëndësishëm, por tani është kthyer në trend.”
Çfarë bën në të vërtetë magnezi?
Sipas Kirsten Jackson, dietologe e specializuar në shëndetin e aparatit tretës, popullariteti i magnezit është rezultat i fushatave të zgjuara të marketingut.
“Magnezi lidhet me fusha ku njerëzit janë të gatshëm të investojnë: gjumi, tretja dhe shëndeti mendor,” thotë ajo. “Por kjo nuk do të thotë se të gjithë kemi nevojë për suplemente.”
Magnezi është një mineral thelbësor për trupin e njeriut. Doza e rekomanduar ditore është 270 mg për gratë dhe 300 mg për burrat, ndërsa në trup ruajmë rreth 25 gramë gjithsej. Ky mineral ndihmon në mbajtjen e funksionit normal të trurit dhe sistemit nervor, rregullon presionin e gjakut, balancimin e nivelit të sheqerit, dhe ndihmon rrahjet e zemrës përmes kontrollit të kalciumit dhe kaliumit në qeliza.
Megjithatë, për ta përfituar realisht efektin, duhet që trupi ynë të ketë mungesë magnezi – diçka që është vështirë të testohet, pasi pjesa më e madhe e tij ruhet në kocka dhe inde.
“Fillova të fle më mirë” – përvoja personale
Katie Curran, një specialiste komunikimi që ka punuar në markat më të njohura të modës, tregon se magnezi e ndihmoi të përmirësonte gjumin.
“Një vit më parë nuk flija dot. Më zinte gjumi shumë vonë, mendja më punonte pa pushim,” rrëfen ajo. Pas dy javësh që mori magnez glicinat (270 mg në ditë), ajo ndjeu ndryshim.
“Mendimet u qetësuan, fillova të fle më gjatë dhe u ndjeva më energjike. Nuk mund ta lidh vetëm me një gjë, por mendoj se magnezi ishte pjesë e rëndësishme e përmirësimit.”
Megjithatë, shkenca nuk është plotësisht në një mendje. Edhe pse mungesa e magnezit mund të ndikojë në gjumë, nuk ka prova të mjaftueshme që suplementet përmirësojnë domosdoshmërisht cilësinë e tij tek personat e shëndetshëm.
Një treg në rritje, por me shumë pasiguri
Në rrjetet sociale, postimet për magnezin janë bërë virale. Influencuesit promovojnë forma të ndryshme të mineralit: Magnez glicinat dhe L-threonat – për trurin, gjumin dhe stresin;
Magnez klorid – për tensionin muskulor dhe dhimbjet menstruale;
Magnez citrat ose oksid – për tretjen dhe kapsllëkun.
Por, sipas nutricionistes Kristen Stavridis, provat shkencore janë të paqëndrueshme. "Shumë studime bien në kundërshtim. Disa tregojnë përfitime, të tjera jo. Dhe për të funksionuar, duhet të jesh vërtet me mungesë magnezi,” thekson ajo.
Sipas të dhënave, rreth 10% e meshkujve dhe 20% e femrave nuk arrijnë të marrin dozën e rekomanduar ditore, por kjo nuk e bën të nevojshëm përdorimin e suplementeve për të gjithë.
“Nuk mund të zgjidhim çdo problem me një pilulë,” paralajmëron Stavridis. “Nëse konsumoni rregullisht ushqime të pasura me magnez – fara, arra, drithëra integrale, zarzavate e fruta – trupi merr gjithçka që i duhet.”
Ajo shton se marrja e tepruar e magnezit mund të shkaktojë të përziera, diarre, madje edhe pasoja serioze për ata që vuajnë nga sëmundjet e veshkave, për shkak të rritjes së niveleve të magnezit në gjak (hipermagnezemi).
“Filloni nga dieta, jo nga suplementi”
Dietologia Kirsten Jackson pajtohet plotësisht:
"Shumica e njerëzve duhet 100% të fillojnë nga dieta. Nëse nuk hani mjaftueshëm ushqime të pasura me magnez, me shumë gjasë ju mungojnë edhe vitamina të tjera thelbësore – si C, K, fibra dhe prebiotikë.” Pra, përpara se të shtoni një tjetër tabletë në rutinën tuaj, ekspertët këshillojnë të shikoni pjatën tuaj të përditshme.
Një dietë e ekuilibruar, e pasur me fara, arra, perime jeshile dhe drithëra integrale, mund të jetë “suplementi” më i mirë që ekziston. “Një tabletë magnezi nuk mund të rregullojë gjithë ushqyerjen e dobët,” përfundon Jackson.
