Presidenti i SHBA-ve, Donald Trump, e konsideron përfundimin e luftës në Rripin e Gazës dhe kthimin e pengjeve si prioritetin kryesor të administratës së tij në Lindjen e Mesme, tha zëdhënësja e Shtëpisë së Bardhë, Caroline Levitt.
Deklarata erdhi vetëm pak orë para takimit të pritshëm mes Trump dhe kryeministrit izraelit, Benjamin Netanyahu, në Uashington.
“Prioriteti kryesor i presidentit për Lindjen e Mesme është t’i japë fund luftës në Gaza dhe të kthejë të gjithë pengjet,” – u shpreh Levitt gjatë një konference për shtyp në Shtëpinë e Bardhë.
Ajo konfirmoi gjithashtu se i dërguari special i SHBA-së për Lindjen e Mesme, Steve Witkoff, do të udhëtojë këtë javë drejt Doha-s, ku aktualisht po zhvillohen bisedime indirekte mes Izraelit dhe Hamasit me ndërmjetësimin e Katarit dhe Egjiptit.
Trump dhe Netanyahu pritet të diskutojnë një marrëveshje të re të propozuar për armëpushim, e cila synon t’i japë fund konfliktit që ka shkaktuar mijëra viktima dhe një krizë të thellë humanitare në territorin palestinez.
Bisedime të kujdesshme edhe me Iranin
Duke iu referuar zhvillimeve rajonale më të gjera, Levitt tha se SHBA-të vazhdojnë të mbajnë kontakte të drejtpërdrejta dhe indirekte me Iranin, në përpjekje për të arritur një marrëveshje mbi programin bërthamor të Teheranit.
Administrata amerikane ka ritheksuar angazhimin e saj për parandalimin e përshkallëzimit të mëtejshëm në rajon, ndërsa i bën thirrje të gjitha palëve të angazhohen në zgjidhje diplomatike afatgjata.
