Qeveria e Australisë ka njoftuar se do të propozojë një legjislacion “udhëheqës në botë” për të ndaluar fëmijët nën 16 vjeç të përdorin rrjetet sociale. Kryeministri Anthony Albanese tha se ligjet e propozuara, që do të paraqiten në parlament javën e ardhshme, synojnë të zbusin “dëmin” që rrjetet sociale po shkaktojnë tek fëmijët australianë.
“Ky ligj është për nënat dhe baballarët… Ata, si unë, janë shumë të shqetësuar për sigurinë e fëmijëve tanë në internet. Dua që familjet australiane të dinë se qeveria ju mbështet,” tha ai.
Ndërsa shumë nga detajet ende nuk janë diskutuar, qeveria deklaroi se ndalimi nuk do të vlejë për të rinjtë që tashmë janë në rrjetet sociale. Nuk do të ketë përjashtime për fëmijët që kanë pëlqimin e prindërve të tyre. Pesha e përgjegjësisë do të bjerë mbi platformat e rrjeteve sociale për të treguar se po marrin masa të arsyeshme për të parandaluar aksesin.
Albanese tha se nuk do të ketë ndëshkime për përdoruesit dhe se rregullatori online i Australisë – Komisioneri për Sigurinë në Internet – do të jetë përgjegjës për zbatimin e ligjeve. Legjislacioni do të hyjë në fuqi 12 muaj pas miratimit dhe do të rishikohet pasi të jetë në zbatim.
Ndërsa shumica e ekspertëve bien dakord se platformat e rrjeteve sociale mund të dëmtojnë shëndetin mendor të adoleshentëve, shumë prej tyre janë të ndarë në lidhje me efektivitetin e ndalimit total. Disa ekspertë argumentojnë se ndalimi vetëm vonon ekspozimin e të rinjve ndaj aplikacioneve si TikTok, Instagram dhe Facebook, në vend që t’i mësojë ata si të navigojnë në hapësira komplekse online.
Përpjekjet e mëparshme për të kufizuar aksesin, përfshirë ato nga Bashkimi Evropian, kanë dështuar ose janë përballur me kundërshtime nga kompanitë e teknologjisë. Gjithashtu, mbeten pyetje se si do të zbatohet kjo nismë duke pasur parasysh se ekzistojnë mjete që mund të anashkalojnë kërkesat për verifikimin e moshës.
Një nga grupet më të mëdha për mbrojtjen e të drejtave të fëmijëve në Australi ka kritikuar ndalimin e propozuar si një “instrument shumë i fortë”. Në një letër të hapur dërguar qeverisë në tetor, e nënshkruar nga mbi 100 akademikë dhe 20 organizata të shoqërisë civile, Task Forca Australiane për të Drejtat e Fëmijëve i bëri thirrje Albanese-it që në vend të ndalimit të konsiderojë vendosjen e “standardeve të sigurisë” për platformat e rrjeteve sociale.
Grupi gjithashtu i referohej këshillave të OKB-së që “politikat kombëtare” të krijuara për të rregulluar hapësirat online duhet të synojnë t’u ofrojnë fëmijëve mundësinë për të përfituar nga mjedisi digjital dhe të sigurojnë akses të sigurt për ta.
Por aktivistë të tjerë të nivelit bazë kanë lobuar për këto ligje, duke thënë se ndalimet janë të nevojshme për të mbrojtur fëmijët nga përmbajtjet e dëmshme, dezinformimi, ngacmimet dhe presionet sociale. Një peticion nga iniciativa “36Months”, e cila ka mbi 125,000 firma, argumenton se fëmijët “nuk janë ende të gatshëm të navigojnë rrjetet sociale në mënyrë të sigurt” deri të paktën në moshën 16 vjeç dhe se aktualisht “përdorimi i tepruar i rrjeteve sociale po ndryshon strukturën e trurit të të rinjve brenda një periudhe kritike të zhvillimit psikologjik, duke shkaktuar një epidemi të sëmundjeve mendore”.
I pyetur nëse duhet të ketë përpjekje më të gjera për të edukuar fëmijët mbi përfitimet dhe rreziqet e të qenit online, Albanese tha se një qasje e tillë do të ishte e pamjaftueshme sepse “supozon një marrëdhënie të barabartë pushteti”.
“Nuk e di për ju, por më dalin gjëra në sistemin tim që nuk dua t’i shoh. Le më një 14-vjeçar të pambrojtur,” tha ai për gazetarët të enjten.
“Këto kompani teknologjike janë jashtëzakonisht të fuqishme. Këto aplikacione kanë algoritme që i drejtojnë njerëzit drejt sjelljeve të caktuara.”
