Dy ditë më parë një 22 vjeçar nga Tirana ka aksidentuar për vdekje një 63-vjeçar në rrugën dytësore “Plepa-Kavajë”.
Ditën e sotme policia rrugore thotë se identifikoi 22-vjeçarin Erjon Kacani banues në Tiranë dhe shpalli në kërkim drejtuesin e automjetit që shkaktoi aksidentin. Kacani menjëherë pas aksidentit u largua nga vendngjarja dhe braktisi automjetin në fshatin Kodër Arapaj. Automjeti u gjet dhe u sekuestrua nga shërbimet e Policisë, në cilësinë e provës materiale.
Ndërkohë mësohet se viktima është avokati Leonard Dingo. Gjatë një reagimi publik, kolegët e tij avokatët ngrenë hije dyshime se vdekja e Leonard Dingos ka ardhur si pasojë e një krimi të mirëfilltë për shkak të detyrës dhe jo siç ka raportuar policia, si “aksident të zakonshëm”.
“Ka më shumë se 48 orë që në zonën e Golemit, Durrës ka ndodhur një aksident me tipare të një krimi, që ende nuk është zbardhur.
Avokati i mirënjohur Leonard Dingo ka ndërruar jetë si rrezultat i një aksidenti që ka ndodhur pranë shtëpisë së tij në një rrugë dytësore rreth orës 12:00 të datës 20 Gusht. Duke ditur çështjet sensitive që mbronte avokat Dingo dyshimet e arsyeshme të drejtojnë përtej një aksidenti të zakonshëm.
Deri tani është gjetur makina që ka bërë aksidentin e braktisur në zonën e Shëna Vlashit, është identifikuar targa dhe rrjedhimisht edhe pronari i makinës, por ajo që do t’i jepte rrugë zbardhjes së aksidentit ende është enigmë. Është kryer një krim dhe asnjë i dyshuar apo i ndaluar!”, kanë reaguar avokatët.
