Qyteti i Vlorës vijon ende të jetë nën përmbytjet e shirave të djeshëm. Sot ky qytet është përballur me një tjetër problematike. Mediat raportojnë se një nga pompat e hidrovorit është përfshirë nga flakët. Më tej bëhet me dije se pas përfshirjes nga flakët të pompës janë stakuar edhe tre pompa të tjera. Mësohet se pompa është përfshirë nga flakët kur po operonte në mënyrë intensive për të përballuar ngarkesën e lartë. Pas zjarrit në vendngjarje kanë mbërritur 3 zjarrfikëse. Ndërkohë një nga punonjësit i cili punon në hidrovorin e qytetit bregdetar ka thënë se si pasojë e mbeturinave që njerëzit hedhin janë shkatërruar 2 pompa.
