Liburn Aliu, drejtor i Portit të Durrësit dhe ish-ministër i Mjedisit në Kosovë, ka përfunduar dëshminë e tij në Prokurorinë Speciale të Kosovës, ku u mor në pyetje për çështjen e njohur si rasti i ambalazhuesve të ujit.
Në prononcimin e dhënë pas daljes nga Prokuroria, Aliu tha se ndihet i lehtësuar që, pas rreth dy vitesh, pati mundësinë të japë versionin e tij mbi hetimet.
Sipas autoriteteve, Aliu dyshohet se gjatë ushtrimit të detyrës si ministër i Mjedisit, në periudhën 2021–2024, ka kryer veprën penale të shpërdorimit të detyrës, duke synuar përfitim të kundërligjshëm për vete ose persona të tjerë dhe duke i shkaktuar dëm buxhetit të Republikës së Kosovës.
Ai i hodhi poshtë këto dyshime, duke theksuar se gjatë mandatit të tij ka vepruar në përputhje me ligjin dhe rekomandimet e Zyrës Kombëtare të Auditimit. Sipas Aliut, nuk ekziston asnjë vendim që e lidh drejtpërdrejt me procesin nën hetim, ndërsa shtoi se edhe hetimet e deritanishme kanë qartësuar rolin e tij.
"Është një lehtësim që pas dy vitesh heshtje pata mundësinë të sqaroj situatën para Prokurorisë... Tani ndihem i lehtësuar", deklaroi Aliu.
