"Nëse do mendim tim personal, lufta duhet të bëhet qoftë dhe nëpër komisione. Pavarësisht se kemi votuar kundër. Në momentin që kemi dalë nga parlamenti s’na ka dalë mirë, as në 2017, kur na u dha një grusht i fortë. Pavarësisht kritikave që kemi e mosdakordësisë, mendoj se një komision i tillë pa duar nuk duhet të lihet, sepse do bëhet mashë e fortë për të goditur sistemin e drejtësisë", kështu ka deklaruar deputeti i PD Saimir Korreshi.
Në këtë mënyrë ai i është bashkuar zërave brenda grupit të deputetëve të Gazment Bardhit për të qenë pjesë e komisionit të posaçwm të reformës. Vetë zoti Bardhi dhe deputetja Dhurata Çupi lanë të kuptohet se janë pro idesë për t’u bërë pjesë e komisionit që pritet të drejtohet nga Fatmir Xhafaj. Por zërat e tyre u mbytën, vetoja e grupit të deputetëve të Rithemelimit që nuk e pranuan idenë e një bashkëpunimi të ri me deputetët e PS. Të njëjtin qëndrim mbajti dhe deputetja Tabaku që më së shumti u shqetësua për faktin se opozita nuk kishte të drejtën e bashkëkryesimit të komisionit të posaçëm të reformës.
Pritet të shihet në ditët në vazhdim se cilat do të jenë lëvizjet e grupit të deputetëve të drejtuar nga Gazment Bardhi lidhur me pjesmarrjen në këtë komision.
