“Vajza e Askujt: Kujtime për mbijetesën ndaj abuzimit dhe luftën për drejtësi” është libri i kujtimeve të Virginia Giuffre, një nga viktimat më të njohura të financierit Jeffrey Epstein. Vepra do të publikohet më 21 tetor 2025, pas vdekjes së saj tragjike në moshën 41-vjeçare.
Giuffre, e cila ishte bërë një figurë kyçe në ekspozimin e skandalit të trafikut seksual të Epstein dhe Ghislaine Maxwell, kishte punuar ngushtësisht me autoren dhe gazetaren Amy Wallace për të përfunduar dorëshkrimin e librit me rreth 400 faqe. Në një email dërguar botuesit të saj, ajo kishte shprehur dëshirën e qartë që kujtimet të botoheshin, pavarësisht rrethanave të saj personale.
Në komunikimin e fundit, Giuffre kishte theksuar rëndësinë e botimit të këtij libri, duke e konsideruar si një dëshmi të domosdoshme për të hedhur dritë mbi dështimet sistemike që lejojnë trafikimin e individëve më të pambrojtur përtej kufijve. Ajo nënvizonte se e vërteta duhet të kuptohet, në mënyrë që shoqëria të ndërgjegjësohet dhe drejtësia të kërkohet jo vetëm për viktimat e së kaluarës, por edhe për mbrojtjen e brezave të ardhshëm.
Sipas botuesit, vepra pritet të sjellë detaje të reja intime, tronditëse dhe zemërthyese mbi periudhën kur Giuffre u trafikua nga Epstein, partnerja e tij Ghislaine Maxwell dhe rrethi i tyre i gjerë i miqve të fuqishëm. Libri do të përmbajë gjithashtu rrëfime të reja që lidhen me Princin Andrew të Mbretërisë së Bashkuar, i cili ishte një nga emrat e përmendur shpesh nga Giuffre në dëshmitë e saj.
Giuffre ishte vetëm 17 vjeç kur akuzoi se ishte trafikuar te Princi Andrew nga Epstein dhe Maxwell. Përmes guximit të saj për të dalë publikisht, ajo u bë një zë i fortë për viktimat e abuzimeve dhe një figurë e rëndësishme në nxitjen e debateve ndërkombëtare për trafikun seksual dhe abuzimin e të miturve.
Skandali i Jeffrey Epstein vazhdon të mbetet një nga çështjet më të diskutuara të dekadës së fundit. Epstein, i cili akuzohej për trafik seksual të të miturve dhe për drejtimin e një rrjeti të gjerë shfrytëzimi, i dha fund jetës në qelinë e tij në vitin 2019, ndërsa priste gjyqin. Nga ana tjetër, Ghislaine Maxwell është marrë në pyetje nga autoritetet amerikane dhe ka mohuar të ketë parë ndonjë sjellje të pahijshme nga Princi Andrew apo ish-presidenti Donald Trump, edhe pse emrat e tyre janë përmendur shpesh në këtë çështje.
