Shqipëria nuk mundi të merrte pikët maksimale në ndeshjen kundër Italisë, edhe pse bëri paraqitje dinjitoze. Kuqezinjtë e nisën mirë takimin duke shënuar që në sekondën e 23 me Nedim Bajramin, i cili përfitoi nga gafa e mbrojtjes italiane dhe kaloi në avantazh Shqipërinë.
Por epërsia nuk zgjati shumë pasi axurët në minutën e 11 barazuan ndeshjen me Bastonin që nuk fali me kokë krosimin që mori nga Pelegrini. Italianët vijuan presionin në portën e kuqezinjve dhe në të 16-ën shënuan të dytin me Barellan.
Në fraksionin e dytë, Shqipëria bëri pak për të trembur Italinë, ndërsa ekipi i Spallettit administroi me qetësi një sukses të rëndësishëm duke e futur në valle për të siguruar kualifikimin në grupin e “ferrit”. Pavarësisht se dalim duar bosh, kjo ishte një paraqitje pozitive, me ëndrrën kuqezi që vijon.
