Në kuadër të aksionit antidrogë që po zhvillohet nga SPAK në disa qytete të vendit, është firmosur urdhër-arresti edhe për Elvis Docin, i njohur ndryshe si Visi i Pojës. Doci është nipi i Xhevdet Troplinit, i njohur si Poja. Gjatë një aksioni të zhvilluar vitin e kaluar, në oborrin e një prej pronave të tyre u zbuluan 3 milionë euro cash.
Në mesin e personave për të cilët është lëshuar urdhër arresti në kuadër të aksionit antidrogë të zhvilluar në dy shtete, është edhe avokati Armand Tragaj dhe dy ish-zyrtarw policie. Po ashtu, janë sekuestruar pasuri me vlerë miliona euro.
I pyetur nëse ka pasur dekonspirim të aksionit që ka çuar në largimin e Visit të Pojës, drejtori i Përgjithshëm i Policisë së Shtetit, Ilir Proda, tha se efektivët ishin përfshirë vetëm dje në aksion.
“Policia e Shtetit është përfshirë vetëm dje në fazën e ekzekutimit të vendimeve penale dhe nuk ka pasur mbikëqyrje të fshehtë fizike apo në vëzhgim asnjë personazh të këtij grupi kriminal. Sa i përket dekonspirimit për mua nuk ka pasur asnjë problem”, tha Proda.
