Një prej goditjeve më të forta kundër krimit të organizuar në Shqipëri është finalizuar së fundmi përmes një operacioni të përbashkët mes SPAK, Antimafias italiane dhe Prokurorisë së Barit.
Në një deklaratë për mediat, kreu i SPAK, Altin Dumani, konfirmoi se u shkatërrua një nga grupet më të fuqishme kriminale në vend, me dyshime të forta për përfshirje në trafikun ndërkombëtar të drogave të forta dhe në pastrimin e parave.
“Është arritur t’i jepet një goditje e fuqishme një prej grupeve kriminale më të fuqishme në Shqipëri për të cilën ka dyshime të forta se ishte i përfshirë në trafikun ndërkombëtar të drogave të forta dhe në pastrimin e parave,” – u shpreh Dumani.
Ai theksoi se ky sukses vjen si rezultat i hetimeve të thelluara dhe bashkëpunimit efektiv ndërinstitucional, duke vënë në dukje rolin vendimtar të besimit dhe profesionalizmit mes strukturave shqiptare dhe partnereve ndërkombëtarë.
Dumani falënderoi prokurorët e SPAK, hetuesit e BKH-së, Policinë e Shtetit, si dhe partnerët italianë që kontribuuan drejtpërdrejt në këtë operacion, duke përfshirë edhe mbështetjen e Eurojust dhe Europol.
Nga ana tjetër, Prokurori Publik i Barit dhe Prokurori i Përgjithshëm, Roberto Rossi, vlerësoi bashkëpunimin e vazhdueshëm mes autoriteteve italiane dhe shqiptare në luftën kundër krimit të organizuar.
“Mafia shqiptare është një forcë ndërkombëtare shumë e madhe, por jemi të sigurt që populli shqiptar me anë të prokurorisë do të jetë në gjendje ta luftojë këtë kancer,” – deklaroi Rossi, duke shtuar se palët janë të sinkronizuara për të arritur objektiva të përbashkëta.
Ky operacion konsiderohet një nga sukseset më të rëndësishme të drejtësisë shqiptare në bashkëpunim me partnerët ndërkombëtarë në betejën kundër krimit të organizuar dhe pastrimit të parave.
