Biznesmeni Gentjan Sula, pronar në zonën e Kodrës së Diellit, i është drejtuar Gjykatës së Posaçme (GJKKO) me një kërkesë për rikthimin e një apartamenti të sekuestruar nga SPAK. Prona është përfshirë në hetimet ndaj ish-kryebashkiakut të Himarës, Jorgo Goro. Sula pretendon se apartamenti ishte dhënë në përdorim Goros, por është në pronësinë e tij dhe duhet t’i kthehet.
Gjyqtari Ardit Mustafaj pritet të shqyrtojë kërkesën e biznesmenit.
Ndërkohë, pak javë më parë, Sula është marrë në pyetje nga Prokuroria e Posaçme në kuadër të hetimeve ndaj kryebashkiakut të Tiranës, Erion Veliaj. Biznesmeni rezulton të ketë udhëtuar me charter me Veliajn, dhe hetuesit i kanë kërkuar sqarime mbi rrethanat e këtyre udhëtimeve. Ai është pyetur gjithashtu në lidhje me lejet e ndërtimit dhe tenderat e përfituar nga Bashkia e Tiranës.
SPAK po heton Erion Veliajn për korrupsion, fshehje pasurie dhe pastrim parash. Hetuesit kanë kontrolluar bizneset e familjarëve të tij dhe u kanë sekuestruar celularët.
