Armando Broja ka lënë pas dëmtimin e pësuar gjatë ndeshjes Shqipëri-Angli, duke rikthyer qetësi tek tifozët e Burnley. Trajneri i klubit, Scott Parker, në konferencën për shtyp, konfirmoi se sulmuesi kuqezi nuk ka pasur shqetësime dhe është stërvitur normalisht me ekipin.
“Shpresoj se Armando do të jetë gati për fundjavë. Gjithçka duket shumë pozitive. Ka qenë në fushë dje dhe sot, të shohim si do të reagojë nesër. Për momentin duket mirë. Jam i kënaqur që lëndimi nuk ka sjellë ndonjë shqetësim tjetër sepse është lojtar i nivelit të lartë”, deklaroi Parker.
Burnley do të përballet të shtunën në shtëpi me Chelsean, skuadër nga e cila Broja u transferua. Momentalisht Burnley ndodhet pranë zonës së rënies nga kategoria, dhe një tjetër humbje mund ta vërë ekipin edhe më shumë në vështirësi, ndonëse është ende herët për të bërë parashikime definitive. Në pesë ndeshjet e fundit kundër Chelsea-s, Burnley nuk ka arritur asnjë fitore.
