Trajneri i AC Milan, Massimiliano Allegri, nuk i kurseu kritikat ndaj skuadrës së tij pas humbjes 2-0 ndaj US Sassuolo në stadiumin Mapei Stadium.
Në prononcimin për Sky Sport, tekniku italian e cilësoi paraqitjen si më të dobëtën e sezonit.
“Sot luajtëm një ndeshje të keqe, më të keqen e kampionatit. Duhet ta lëmë mënjanë dhe të përqendrohemi te puna e fortë. Tani fokusi është te ndeshja e radhës kundër Atalanta BC. Ishte një paraqitje shumë e dobët dhe përjashtimi na penalizoi. Duhet të kemi forcën për t’u rikthyer,” u shpreh Allegri.
Ai foli edhe për momentin e vështirë që po kalon skuadra gjatë sezonit, duke theksuar se rezultatet aktuale janë pasqyrë e asaj që ekipi ka dhënë në fushë.
“Pikët që kemi janë ato që meritojmë. Duhet të gjejmë një zgjidhje. Për momentin, sipas mendimit tim, ajo është të qëndrojmë të bashkuar, të punojmë fort dhe të përgatitemi për ndeshjen e ardhshme. Gjithçka që kemi bërë deri tani duhet të lihet mënjanë, përfshirë edhe këtë paraqitje. Fati ynë është ende në duart tona,” përfundoi trajneri i Milanit.
