Është shtyrë shpallja e vendimit në gjyqin e parë masiv në El Salvador ndaj qindra anëtarëve të dyshuar të bandës famëkeqe Mara Salvatrucha, e njohur si MS-13.
Në bankën e të akuzuarve janë 485 persona, të cilëve u atribuohen në total më shumë se 47 mijë vepra penale, të dyshuara se janë kryer gjatë viteve 2012–2022. Procesi gjyqësor ka nisur në prill.
Dosja përfshin akuza për vrasje, vrasje të grave, trafik armësh dhe droge, zhdukje me forcë dhe krime të tjera të rënda. Mes të pandehurve janë edhe 22 drejtues të rëndësishëm të MS-13, të cilët përballen me akuza të lidhura me rreth 29 mijë vrasje.
Prokuroria e El Salvadorit ka deklaruar se do të kërkojë dënime që, të mbledhura së bashku, arrijnë në mijëra vite burg për drejtuesit e organizatës.
Procesi është pjesë e ofensivës së presidentit Nayib Bukele kundër bandave kriminale. Që prej vendosjes së gjendjes së jashtëzakonshme në vitin 2022, autoritetet kanë kryer arrestime masive të personave të dyshuar për lidhje me grupet kriminale, një politikë që ka rritur mbështetjen për presidentin, por ka sjellë edhe kritika nga organizatat e të drejtave të njeriut.
Bukele e ka krahasuar gjyqin ndaj drejtuesve të MS-13 me Gjyqet e Nurembergut, ndërsa organizatat e të drejtave të njeriut kundërshtojnë gjykimin masiv, duke argumentuar se një proces i përbashkët për qindra persona mund të cenojë të drejtën e secilit për një gjykim individual dhe të drejtë.
Vendimi ndaj 485 të pandehurve pritej të shpallej të dielën, por seanca është shtyrë dhe pritet të caktohet një moment i ri për dhënien e vendimit.
