Qytetarët në Maqedoninë e Veriut po i drejtohen këtë të diele kutive të votimit për të zgjedhur të parët e qyteteve të tyre, një vit pasi vendim mbajti zgjedhjet parlamentare dhe presidenciale.
Të drejtë vote kanë mbi 1 milion e 800 mijë qytetarë ndërsa 112 mijë janë të regjistruar në listën e veçantë zgjedhore si persona që jetojnë jashtë shtetit. Sipas Komisionit Shtetëror të Zgjedhjeve, raportohet se deri në orën 15:00 kanë votuar 515,069 qytetarë ose thënë ndryshe 31.16 përqind. Ministri i Brendshëm në Maqedoninë e Veriut, në një konferencë për shtyp deklaroi se procesi ka qenë i qetë ndërsa raportoi dy arrestime të personave që tentuan të blinin vota.
Këto zgjedhje të pushtetit vendor janë të tetat që nga pavarësia e vendit dhe qytetarët votojnë për 309 kandidatë për kryetar komune dhe për 576 lista këshilltarësh. Në garë marrin pjesë 22 parti politike, 19 koalicione dhe 119 iniciativa qytetare ose kandidatura të pavarura.
Sipas sondazheve të kryera gjatë kësaj periudhe, rezultati në komunat me shumicë maqedonase pritet të jetë i parashikueshëm, ndërsa në komunat shqiptare është një situatë tjetër.
VMRO-DMPNE është partia që kryeson në sondazhe me 26.7%, e ndjekur nga Lidhja socialdemokrate e Maqedonisë me 11.1% dhe forcë e tretë është BDI dhe Aleanca Kombëtare për Integrim me 9.9%. Në fund vjen Koalicioni VLEN me 7.5%.
Ndërkohë lidhja socialdemokrate është në një krizë të brendshme pasi humbi thellë në zgjedhjet e vitit 2024 dhe po përpiqet të ruajë ndikimin në disa komuna.
Ndërsa në rreth 15 komuna me shumicë shqiptare, gara është e ashpër mes BDI dhe koalicionit opozitar Aleanca Kombëtare për Integrim (AKI) dhe koalicionit VLEN, që është aktualisht partner në qeveri me VMRO-DPMNE.
