Të mandatuarit e Partisë Demokratike zhvilluan këtë të diel një takim me sekretarin e Partisë së Lirisë, Tedi Blushi, në kuadër të konsultimeve për zgjedhjet e ardhshme në Bashkinë e Tiranës.
Pas mbledhjes, Flamur Noka deklaroi se opozita është pranë finalizimit të kandidaturës për kryebashkiak të kryeqytetit.
“Ju siguroj që është çështje ditësh. Ne jemi opozitë dhe forcë demokratike, ndaj ndjekim hapat dhe procedurat, konsultohemi dhe më pas vendosim. Shumë shpejt do të keni emrin e kandidatit të opozitës,” – u shpreh ai, duke shtuar se nga procesi do të përjashtohet vetëm “e majta radikale e Arlind Qorrit”.
Nga ana tjetër, sekretari i Partisë së Lirisë, Tedi Blushi, theksoi se kandidatura opozitare do të jetë gjithëpërfshirëse dhe jo e vendosur nga lart-poshtë.
“Përballë kandidates së COVID ne po zgjedhim vaksinën e duhur, e cila do shërojë njëherë e përgjithmonë kryeqytetin. Vaksina jonë ndaj COVID-it të Edi Ramës do të kthejë Bashkinë e Tiranës në shërbim të qytetarëve dhe do t’i japë fund paligjshmërisë, korrupsionit dhe krimit,” – deklaroi Blushi.
