Kreu i Partisë Demokratike, Sali Berisha, gjatë tryezës së diskutimit për projektin e Portit të Durrësit, akuzoi se edhe zona e Portit të Peshkimit është pjesë e një skeme të gjerë korrupsioni. Duke iu referuar deklaratave të tij, Berisha tha se porti i peshkimit u ndërtua me fondet e Bankës Botërore, por më pas “u mor nga Naim Bej dhe Gjergj Luca, të cilët ai i cilësoi si trafikantë të njohur”.
Sipas Berishës, këta individë kanë kërkuar të kenë “akseset e tyre në profesionin që ushtronin”, duke përfituar nga një investim publik me vlerë të lartë. Ai theksoi se zona e marinës turistike në Durrës kishte qenë e përcaktuar që në vitin 2013, me tender të zhvilluar dhe fitues të shpallur, por projekti u devijua për arsye që, sipas tij, lidhen me interesa private.
“Durrësi në 2013 kishte zonën e përcaktuar për Marinën e vet, donte një Port marine. I mungonte porti i Peshkimit, dhe zona porti i peshkimit u ndërtua me paratë e bankës botërore, dhe atë e morën një Naim Bej dhe Gjergj Luca trafikantë të njohur. Donin të kishin akseset e tyre në profesionin që ushtronin. Por marina ishte përcaktuar mes Currilave dhe hotel Vollgës, ishte bërë tenderi, ishte shpallur fituesi dhe do niste puna, por historia është kjo…”, tha kreu i PD
