Lideri i opozitës izraelite, Yair Lapid, ka akuzuar qeverinë e Benjamin Netanyahut se po përpiqet të përdorë politikisht incidentin me avionin e Flydubai, i cili u detyrua të ulej në Arabinë Saudite pas një alarmi sigurie.
Lapid hodhi poshtë pretendimet se ngjarja kishte lidhje me informacionin e sigurisë që ai kishte marrë një natë më parë nga kryeministri Netanyahu. Sipas tij, gjatë atij takimi nuk ishte përmendur asgjë që lidhej me incidentin e avionit.
“Asgjë që i ngjante incidentit të mëngjesit me avionin nuk u përmend në takimin e sigurisë me kryeministrin. Asgjë e ngjashme, asgjë që ta kujtonte, as edhe një aluzion”, shkroi Lapid në platformën X.
Ai akuzoi zërat pranë qeverisë se po prodhojnë “spin” politik mbi një çështje sigurie. “E gjithë propaganda që po bëjnë tani zëdhënësit vetëm provon atë që ishte e qartë që dje: ata po përpiqen sërish të bëjnë politikë të lirë në kurriz të sigurisë së Izraelit. Një tufë e papërgjegjshme”, tha Lapid.
Polemika shpërtheu pas incidentit me fluturimin FZ1073 të Flydubai, që udhëtonte nga Dubai drejt Tel Avivit. Avioni transmetoi kode emergjence dhe ndërhyrjeje të paligjshme, përpara se të devijohej dhe të ulej në mënyrë të sigurt në Tabuk të Arabisë Saudite.
Autoritetet izraelite fillimisht hetuan mundësinë e një rrëmbimi apo incidenti sigurie, ndërsa më pas raportimet folën për një përplasje në kabinën e pilotëve. Aeroporti Ndërkombëtar “Prince Sultan bin Abdulaziz” në Tabuk njoftoi se kapiteni dhe oficeri i parë i avionit mbetën të plagosur dhe u dërguan në spital për ndihmë mjekësore.
