Disa lloje kanceri po diagnostikohen gjithnjë e më shpesh te personat nën 50 vjeç, sipas një analize të re të Fondit Botëror për Kërkimin e Kancerit, WCRF. Të dhënat nga Anglia, SHBA-ja dhe Holanda tregojnë se kjo prirje prek disa organe dhe kërkon më shumë vëmendje ndaj parandalimit dhe diagnostikimit të hershëm.
Analiza evidentoi rritje të konsiderueshme të rasteve për shtatë lloje kanceri në Angli, pesë në SHBA dhe katër në Holandë. Në Angli, mes tyre janë kanceri i gjirit, zorrës së trashë, veshkave, mëlçisë, pankreasit, prostatës dhe mitrës.
Të dhënat tregojnë se shkalla e diagnostikimit të kancerit të prostatës te meshkujt nën 50 vjeç në Angli u rrit nga rreth një rast për 100 mijë persona në vitin 2001, në 3.6 raste në vitin 2023. Për kancerin e zorrës së trashë, shkalla e rasteve në këtë grupmoshë është afërsisht dyfishuar.
Studiuesit theksojnë se shkaqet e rritjes ende nuk janë kuptuar plotësisht. Mbipesha, mungesa e aktivitetit fizik, ushqyerja, alkooli dhe duhani mund të kontribuojnë. Po hetohen gjithashtu ndikimi i ndotjes dhe ndryshimet në mikroorganizmat e zorrëve.
Një pjesë e shtimit të diagnozave mund të lidhet me ndërgjegjësimin më të madh dhe zbulimin më të hershëm, por këta faktorë nuk e shpjegojnë të gjithë prirjen.
Megjithatë, WCRF sqaron se kanceri vazhdon të jetë shumë më i zakonshëm te të moshuarit. Gjetjet tregojnë nevojën për të kuptuar pse disa forma të sëmundjes po shtohen te brezat më të rinj.
