Babai i një prej talenteve të Manchester Cityt ka hedhur dritë mbi një detaj të mundshëm në kontratat e futbollistëve të klubit, në lidhje me situatën e krijuar pas vendimit për shkeljet financiare në Premier League.
Manchester City u shpall fajtor për 114 nga 115 akuzat e ngritura ndaj tij nga Premier League, pas një procesi të gjatë përpara një komisioni të pavarur. Vendimi u bë publik më 25 shtator, ndërsa më 29 shtator u publikuan edhe arsyetimi dhe gjetjet e komisionit.
Në këtë situatë ka reaguar edhe Emile Heskey, ish-sulmuesi i Liverpoolit dhe babai i talentit të Manchester Cityt, Jaden Heskey. Ai sugjeroi se futbollistët e klubit mund të kenë klauzola të veçanta në kontratat e tyre, të cilat do t’u mundësonin të largoheshin në rast të një situate të jashtëzakonshme.
“Le të jemi të sinqertë, kjo nuk është diçka që thjesht ka rënë papritur mbi të gjithë. Është diçka që ka vazhduar prej një kohe të gjatë”, deklaroi Heskey për Casinolyze.
Sipas tij, lojtarët që janë transferuar te City duhet të kenë qenë në dijeni për situatën dhe shqetësimet e tyre mund të jenë diskutuar më herët me drejtuesit e klubit.
“Çdo lojtar që kanë transferuar duhet ta ketë pasur këtë në mendje. Besoj se shqetësimet e tyre janë zbutur përmes bisedave me drejtuesit dhe klubin. Tani situata ka arritur në pikën kritike”, u shpreh ai.
Heskey shtoi se nuk përjashton mundësinë që disa prej kontratave të futbollistëve të përmbajnë klauzola që parashikojnë largimin e tyre ose mënyrën se si do të trajtohej një situatë e tillë.
“Ka shumë gjasa që të kenë pasur klauzola në kontratat e tyre që u lejojnë të largohen ose që përcaktojnë se si trajtohet kjo situatë. Ky problem nuk ka dalë nga hiçi”, tha ish-sulmuesi anglez.
Manchester City tashmë ka bërë të ditur se do të apelojë vendimin. Nëse në përfundim të procesit do të vendosen sanksione sportive të rënda, e ardhmja e disa prej futbollistëve kryesorë mund të bëhet një çështje për t’u diskutuar.
Sa i përket dënimit të mundshëm, Heskey është shprehur se një zbritje e konsiderueshme pikësh mund të jetë vetëm një pjesë e pasojave që mund të përballet klubi.
