Franca dhe Italia po udhëheqin një përpjekje brenda Bashkimit Europian për të vendosur kufizime të reja ndaj importeve të kimikateve dhe produkteve plastike, ndërsa industria europiane po përballet me një krizë të thellë.
Sipas Reuters, Franca, Italia dhe me shumë gjasa Gjermania planifikojnë t’i kërkojnë Komisionit Europian përdorimin e një instrumenti tregtar që BE-ja e ka përdorur rrallë deri tani: masat e ashtuquajtura “safeguards”.
Në praktikë, BE-ja mund të vendosë kuota importi, ndërsa produktet që e tejkalojnë kufirin e përcaktuar do të përballeshin me tarifa shtesë.
Në shënjestër janë veçanërisht importet e lira, kryesisht nga Kina.
Masat e para që po diskutohen përfshijnë PET-in, material i përdorur gjerësisht në ambalazhe dhe shishe plastike, si dhe rrëshirat epoxy dhe fibrat e qelqit.
Industria kimike europiane po përjeton atë që përfaqësues të sektorit e përshkruajnë si një nga krizat më të mëdha të dekadave të fundit.
Kompanitë europiane po përballen me çmime më të larta të energjisë, kërkesë të dobët dhe produkte aziatike me çmime që shpesh janë dukshëm më të ulëta.
Tarifat amerikane të administratës Trump kanë shtuar edhe një problem tjetër: një pjesë e produkteve kineze që e kanë më të vështirë hyrjen në SHBA po orientohen drejt tregut europian.
Kompanitë e mëdha gjermane si BASF, Lanxess dhe Wacker kanë nisur tashmë shkurtime të vendeve të punës.
Ndryshe nga tarifat antidumping, që aplikohen ndaj vendeve ose kompanive specifike, masat mbrojtëse të propozuara mund të zbatohen më gjerësisht ndaj partnerëve tregtarë.
Nëse miratohen, ato do të shënonin një tjetër ndryshim të rëndësishëm në politikën tregtare europiane dhe një lëvizje drejt mbrojtjes më agresive të industrisë së kontinentit.
