Presidenti i SHBA-së, Donald Trump, ka njoftuar shtyrjen për pesë ditë të sulmeve të paralajmëruara ndaj infrastrukturës energjetike të Iranit, duke deklaruar se janë duke u zhvilluar “bisedime shumë të mira dhe produktive” për të ulur tensionet në Lindjen e Mesme.
Megjithatë, Irani e ka mohuar kategorikisht ekzistencën e negociatave me Uashingtonin. Një zyrtar i lartë i sigurisë, i cituar nga agjencia iraniane Fars, tha se Trump është tërhequr nga planet për sulm pasi kërcënimet ushtarake të Teheranit janë marrë seriozisht.
Sipas tij, presioni i tregjeve financiare dhe shqetësimet për ndikimin që konflikti mund të kishte mbi obligacionet dhe ekonomitë në SHBA dhe në Perëndim kanë qenë gjithashtu faktorë që ndikuan në këtë hap pas.
Zyrtari iranian shtoi se, edhe pse ndërmjetës të ndryshëm kanë dërguar mesazhe në Teheran që nga fillimi i luftës, përgjigjja e Iranit ka qenë e qartë: vendi do të vazhdojë të mbrohet derisa të arrijë nivelin e nevojshëm të parandalimit ushtarak.
“Nuk ka pasur negociata dhe nuk ka negociata në zhvillim”, theksoi burimi iranian, duke hedhur poshtë pretendimet e presidentit amerikan për bisedime mes dy vendeve.
