Presidenti amerikan Donald Trump dhe homologu i tij ukrainas Volodymyr Zelensky deklaruan se është shënuar përparim drejt përfundimit të luftës në Ukrainë gjatë bisedimeve të zhvilluara në Florida. Megjithatë, Trump theksoi se ende mbeten “një ose dy çështje shumë të vështira”, me theks të veçantë te territori.
Duke folur për mediat në Mar-a-Lago, të dy liderët i cilësuan bisedimet si “shumë të mira”. Zelensky tha se palët kanë rënë dakord për rreth 90% të një plani paqeje me 20 pika, ndërsa Trump deklaroi se garancitë e sigurisë për Ukrainën janë “95% gati”, pa dhënë detaje konkrete për mbështetje ushtarake apo dislokim trupash.
Një nga pikat ende të pazgjidhura mbetet propozimi për shndërrimin e rajonit të Donbasit në lindje të Ukrainës në një zonë të demilitarizuar. “Disa nga këto toka janë marrë. Disa mund të jenë ende për t’u diskutuar, por mund të merren në muajt në vijim,” tha Trump.
Rusia kontrollon aktualisht rreth 20% të territorit ukrainas, përfshirë afërsisht 75% të rajonit të Donetskut dhe 99% të Luhanskut, të njohura së bashku si Donbas. Moska kërkon që Ukraina të tërhiqet edhe nga pjesët e mbetura që ende i kontrollon në këtë rajon, ndërsa Kievi ka propozuar që zona të kthehet në një zonë të lirë ekonomike, e ruajtur nga forcat ukrainase.
Trump pranoi se çështja e territoreve është “shumë e vështirë”, por shtoi se ajo “do të zgjidhet”. Ai hodhi gjithashtu idenë e bisedimeve trepalëshe mes SHBA-së, Rusisë dhe Ukrainës “në kohën e duhur”.
Presidenti amerikan zhvilloi më herët edhe një bisedë telefonike me presidentin rus Vladimir Putin. Trump tha se beson që Putin “dëshiron që Ukraina të ketë sukses”, por pranoi se Moska nuk është e interesuar për një armëpushim që do t’i lejonte Ukrainës të mbante referendum.
Këshilltari i politikës së jashtme të Kremlinit, Yuri Ushakov, deklaroi se telefonata u iniciua nga Trump dhe se të dy presidentët ndanë qëndrimin se një armëpushim i përkohshëm, i propozuar nga BE-ja dhe Ukraina, do ta zgjaste konfliktin.
Zelensky njoftoi se ekipet amerikane dhe ukrainase do të takohen sërish javën e ardhshme, ndërsa la të hapur mundësinë e një takimi në Shtëpinë e Bardhë në janar, edhe me pjesëmarrjen e liderëve evropianë.
Presidentja e Komisionit Evropian, Ursula von der Leyen, vlerësoi “përparimin e mirë” në bisedimet e Floridës, duke theksuar nevojën për garanci të forta sigurie për Ukrainën që nga dita e parë. Ndërkohë, presidenti francez Emmanuel Macron njoftoi se në fillim të janarit do të mbahet një takim në Paris i vendeve aleate për të finalizuar kontributet konkrete në garancitë e sigurisë për Ukrainën.
