Më shumë se dy muaj pas vdekjes së ikonës së televizionit italian Pippo Baudo, trashëgimia e tij prej rreth 10 milionë eurosh mbetet ende e paqartë dhe e bllokuar. Testamenti, i hapur më 7 shtator nga noteri Renato Carraffa, ka caktuar si trashëgimtarë fëmijët Alessandro dhe Tiziana, si dhe sekretaren besnike të prezantuesit, Dina Minna. Përfshirja e saj ka shkaktuar tensione brenda familjes.
Sipas mediave italiane, bllokimi i trashëgimisë lidhet me dyshimet mbi vlerën e saj reale. Përveç shumës së deklaruar, pasuria përfshin apartamente luksoze në qendër të Romës, zyra në Prati, tokë bujqësore në Sicili e Lazio, si dhe interesa në kompani ndërtimi. Vetëm pronat e paluajtshme kapin vlerën e mbi 6 milionë eurove. Ndër vite, Baudo ka shitur edhe vila të rëndësishme, përfshirë një në Morlupo dhe një tjetër në Sardenjë.
Pjesa më e madhe e trashëgimisë së deklaruar i lihet Dina Minnës, asistentes që e shoqëroi për 36 vite. Ajo e përshkroi Baudos si “si baba”, dhe qëndroi pranë tij deri në momentet e fundit, madje edhe gjatë udhëtimit të fundit drejt Sicilisë, ku dhjetëra qytetarë nderuan karrocën mortore.
Megjithatë, ende asnjë prej trashëgimtarëve nuk ka marrë vendim zyrtar për pranimin e pasurisë. Pyetjet shtohen: a është vlera reale shumë më e madhe se ajo e deklaruar? A ka prona ose të ardhura që nuk janë llogaritur ende?
Për momentin, trashëgimia e Pippo Baudos mbetet pezull, ndërsa misteri rreth pasurisë së tij vetëm sa thellohet.
