Hetuesit amerikanë po kërkojnë ende motivin e sulmit të ndodhur mbrëmjen e së mërkurës pranë Shtëpisë së Bardhë, ku dy anëtarë të sapobetuar të Gardës Kombëtare u qëlluan në një “ambush” të mirëorganizuar.
Autoritetet identifikuan autorin si Rahmanullah Lakanwal, 29 vjeç, një shtetas afgan i ardhur në SHBA në vitin 2021 përmes programit Operation Allies Welcome, i cili strehoi afganët që ndihmuan trupat amerikane gjatë luftës. Zyrtarë të inteligjencës konfirmuan se Lakanwal kishte punuar me njësi të mbështetura nga CIA në Kandahar gjatë konfliktit.
Sipas Prokurorisë së Uashingtonit, viktimat janë Sarah Beckstrom, 20 vjeçe, dhe Andrew Wolfe, 24 vjeç, që ishin betuar si pjesë e Gardës Kombëtare vetëm 24 orë para ngjarjes. Autori u afrua pa paralajmërim dhe hapi zjarr me një revolver .357 Magnum, duke qëlluar fillimisht një prej tyre që ra në tokë, më pas duke shtënë disa herë ndaj ushtarit të dytë. Të dy mbeten në gjendje kritike.
FBI njoftoi se Lakanwal kishte udhëtuar me automjet nga shteti i Washington drejt kryeqytetit me qëllim të paramenduar për të kryer sulmin. Agjentët bastisën banesat e tij në Washington dhe San Diego, ku sekuestruan telefona, laptopë dhe pajisje të tjera elektronike në kuadër të një hetimi për terrorizëm.
Prokurorja e Përgjithshme Pam Bondi deklaroi se ndaj autorit do të ngrihen akuza për terrorizëm dhe do të kërkohet dënimi maksimal me burgim të përjetshëm.
Ngjarja ka shkaktuar reagim të menjëhershëm politik në SHBA. Qeveria federale ka pezulluar përkohësisht përpunimin e kërkesave të emigracionit për shtetas afganë, ndërsa zyrtarë të lartë thonë se protokollet e sigurisë do të rishikohen.
Ndërkohë, autoritetet vazhdojnë të hetojnë nëse autori kishte lidhje me grupe ekstremiste apo ka vepruar i vetëm. Motivacioni i sulmit mbetet ende i paqartë.
