Policia franceze ka ushtruar kontroll në banesën e ministres së Kulturës, Rachida Dati, më 10 dhjetor, në kuadër të një hetimi për korrupsion të hapur nga Prokuroria Kombëtare Financiare më 14 tetor.
Sipas autoriteteve, Dati dyshohet se ka përfituar rreth 350 mijë dollarë pagesa të padeklaruara nga grupi energjetik GDF Suez, gjatë periudhës 2010–2011, kur ajo shërbente si deputete e Parlamentit Evropian. Ministrja i ka mohuar akuzat, duke deklaruar se nuk ka kryer asnjë shkelje ligjore.
Ky nuk është rasti i vetëm që lidhet me emrin e saj. Në një çështje të veçantë, në vitin 2021, Dati u akuzua për korrupsion pasiv në lidhje me pagesa të dyshuara që lidhen me ish-drejtorin e Renault, Carlos Ghosn. Edhe në këtë rast, ajo ka hedhur poshtë çdo akuzë.
Hetimet ndaj Rachida Datit zhvillohen ndërkohë që ajo është e angazhuar në fushatën për zgjedhjet bashkiake të Parisit, të planifikuara për marsin e vitit 2026, ku synon postin e kryetares së bashkisë.
