Policia belge ka bastisur zyrat e Komisionit Europian, në kuadër të një hetimi për dyshime mbi parregullsi në shitjen e aseteve të pasurive të paluajtshme. Lajmi është raportuar nga “Financial Times”, që citon burime të njohura me çështjen.
Sipas raportimit, hetimi drejtohet nga Zyra e Prokurorit Publik Europian (EPPO) dhe lidhet me shitjen e 23 ndërtesave, të cilat në vitin 2024 u blenë nga fondi sovran belg SFPIM për shumën 900 milionë euro. Në momentin e transaksionit, Komisioni Europian kishte deklaruar se procesi ishte zhvilluar përmes një tenderi, në përputhje me rregulloret financiare të Bashkimit Europian.
EPPO ka konfirmuar se bastisja ka ndodhur, por nuk ka dhënë detaje të tjera lidhur me hetimin. Ndërkohë, policia belge ka refuzuar të komentojë mbi zhvillimin.
