Lufta mes SHBA-së, Izraelit dhe Iranit po trondit rëndë Dubain, qytetin që për dekada ishte ndërtuar si simbol i luksit, turizmit dhe biznesit global. Konflikti ka goditur drejtpërdrejt Emiratet e Bashkuara Arabe, të cilat kanë marrë më shumë se dy të tretat e sulmeve iraniane në rajon.
Që nga fillimi i luftës, dhjetëra mijëra turistë dhe banorë të huaj janë larguar nga Dubai, ndërsa alarmet për rrezik raketash bien çdo ditë në telefonat e qytetarëve. Edhe pse mbi 90% e rreth 1700 raketave dhe dronëve iranianë janë neutralizuar nga sistemet e mbrojtjes, disa prej tyre kanë goditur objektiva të rëndësishëm, përfshirë baza ushtarake, komplekse industriale dhe aeroportin e Dubait, një nga nyjet ajrore më të mëdha në botë.
Një sulm goditi edhe hotelin luksoz Fairmont në ishullin artificial Palm, ndërsa një shofer taksie nga Pakistani, Zain Anwar, tregoi se makina e tij u shkatërrua gjatë sulmit ndërsa ai ishte duke u falur.
“Jam me fat që kam mbijetuar, por tani familja po më thotë të kthehem në shtëpi. Nuk ka më punë dhe turizmi është zhdukur,” tha ai.
Ekonomia e Dubait rrezikon goditje të rëndë, pasi turizmi gjeneron rreth 30 miliardë dollarë në vit. Mbi 90% e banorëve të qytetit janë të huaj, përfshirë një numër shumë të madh miliarderësh që kanë zgjedhur Dubain për shkak të taksave shumë të ulëta.
Ndryshe nga emiratet e tjera të Gjirit, Dubai nuk ka rezerva të mëdha nafte, ndaj ekonomia e tij varet kryesisht nga turizmi, financat dhe investimet. Analistët paralajmërojnë se nëse lufta vazhdon edhe disa javë, dëmet për aviacionin, turizmin dhe bizneset e huaja mund të jenë shumë të mëdha.
Disa banka ndërkombëtare, përfshirë Citibank dhe Standard Chartered, kanë filluar tashmë evakuimin e punonjësve nga Dubai për shkak të shqetësimeve të sigurisë.
Autoritetet e Dubait ndërkohë po përpiqen të ruajnë një imazh normaliteti. Policia ka paralajmëruar se personat që përhapin panik në rrjetet sociale mund të arrestohen, ndërsa zyrtarët theksojnë se shpërthimet që dëgjohen në qiell janë “zëri i sigurisë”, pasi shumica e raketave po neutralizohen.
Megjithatë, ndërsa turistët dhe të pasurit po largohen, miliona punëtorë migrantë nga Azia dhe Afrika nuk kanë mundësi të ikin. Shumë prej tyre vazhdojnë të punojnë në ndërtim, transport dhe shërbime, pavarësisht rrezikut nga sulmet.
Deri tani, katër persona kanë humbur jetën në Emiratet e Bashkuara Arabe nga sulmet e lidhura me konfliktin, shumica prej tyre punëtorë migrantë nga Azia Jugore. Analistët paralajmërojnë se nëse lufta vazhdon, “ëndrra e Dubait” si strehë e sigurt për turizmin dhe biznesin global mund të vihet seriozisht në pikëpyetje.
