Ish-presidenti i Francës, Nicolas Sarkozy, është vendosur sërish në qendër të vëmendjes mediatike, këtë herë pas një shkrimi të publikuar nga revista franceze Le Point, e cila pretendon se ai ndodhet në burgun Santé në Paris, ku po përballet me kushte të pazakonta ushqimore dhe masa të rrepta sigurie.
Sipas burimeve të medias franceze, Sarkozy, i cili dyshohet se ka nisur vuajtjen e një dënimi për financimin e fushatës elektorale të vitit 2007 nga Libia, ka refuzuar çdo ushqim që i shërbehet në qelinë e tij. Arsyeja, sipas artikullit, lidhet me frikën nga helmimi ose sabotimi i ushqimit nga të burgosurit e tjerë, për shkak të klimës armiqësore ndaj tij.
“Ai nuk prek asgjë që i vjen nga mensa. Ka frikë se dikush mund t’i ketë pështyrë në pjatë, ose më keq, ta helmojë,” citohet të kenë thënë burime pranë ish-presidentit.
Mediat raportojnë se alternativa e gatimit vetë, e lejuar nëpërmjet furnizimit me produkte bazike nga mensa e burgut, është refuzuar gjithashtu nga Sarkozy. Sipas një personi nga rrethi i tij i ngushtë:
“Ai as vezë nuk di të ziejë. Gatimi është i pamundur për të.”
Kjo situatë ka bërë që, prej më shumë se dy javësh, ish-kreu i shtetit të ushqehet ekskluzivisht me kos, një regjim që po ngre shqetësime për shëndetin e tij.
Ndërkaq, sipas Le Point, data 10 nëntor pritet të jetë vendimtare, pasi gjykata do të rishqyrtojë masën ndaj tij dhe mundësinë e lirimit.
