Në një analizë me tone të errëta për Ukrainën, CNN parashikon një skenar të mundshëm pas takimit të nivelit të lartë midis Donald Trump dhe Vladimir Putin në Alaskë, duke e përshkruar këtë si një “humbje të ngadaltë” për Kievin.Presidenti rus përpiqet, në një vend me rëndësi simbolike, i cili u shit nga Rusia në Shtetet e Bashkuara para 158 vitesh për 7.2 milionë dollarë, të promovojë “marrëveshjen e tij të shekullit”, duke detyruar Ukrainën të dorëzojë territore që ende nuk ka arritur t’i rimarrë.
Analisti i CNN thekson se kushtet për samitin e së premtes favorizojnë Rusinë në masë të madhe, duke bërë të pamundur imagjinimin e një marrëveshjeje që nuk do të dëmtojë thellë Ukrainën. Në fokus është propozimi i Putinit për dorëzimin e territoreve pa luftë, ide e pranuar nga disa palë të interesuara që nuk kuptojnë plotësisht kompleksitetin e sovranitetit ukrainas dhe vuajtjet e luftës.
Sipas CNN, Rusia është afër rrethimit të dy qyteteve kyçe në rajonin e Donetskut, Pokrovska dhe Kostiantynivka, dhe mund të vërë në rrethim forcat ukrainase në javët në vijim. Dhënia e këtyre dy qyteteve mund të jetë e pashmangshme për Kievin për të ruajtur kapacitetin njerëzor. Qytetet e tjera në Donetsk, si Kramatorsk dhe Sloviansk, kanë perspektiva më të zymta, ku mijëra civilë jetojnë dhe pritet që Moska të gëzohet me evakuimin e tyre pa rezistencë.
Në lidhje me pyetjen se çfarë mund të fitojë Ukraina nga kjo “këmbim-territoriale” që përmend Trump, CNN thekson se mund të jenë vetëm disa zona të vogla në kufijtë me rajonet Sumi dhe Kharkiv, pjesë e “zonës së sigurisë” që propozon Putin, por jo shumë më tepër.
Analisti shton se një armëpushim i menjëhershëm është i vështirë, pasi Putin ka argumentuar se më parë duhet të zgjidhen çështje teknike lidhur me monitorimin dhe logjistikën. Ai thekson se Putini ka bërë të qartë që qëllimi i tij është nënshtrimi ose pushtimi i plotë i Ukrainës dhe një rivendosje strategjike me SHBA-të, duke përfshirë braktisjen e Kievit.
CNN përmend edhe dy elementë që kanë ndryshuar qëndrimin e Trump: kontaktet telefonike të Kinës dhe Indisë me Kremlinin dhe zhvillimet politike brenda SHBA-së, ku Trump tregon një ndjesi zhgënjimi dhe është më i matur në reagime ndaj Rusisë.
Në këtë kontekst, CNN paralajmëron se skenari duket i favorizuar për Putinin, i cili pritet të ketë një fitore strategjike në frontin lindor, dhe që është ftuar në SHBA për herë të parë pas një dekade për të diskutuar paqen në Ukrainë, pa praninë e vetë Ukrainës.
