Policia e Shtetit ka finalizuar me sukses ekstradimin nga Italia të shtetasit Gjovalin Lesi, 56 vjeç, i dënuar me burgim të përjetshëm nga Gjykata e Mirditës për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”.
Ekstradimi është rezultat i bashkëpunimit të ngushtë mes Policisë së Shtetit, Interpol Tiranës, Interpol Romës, Policisë italiane dhe institucioneve të tjera ndërkombëtare të sigurisë.
Shtetasi Lesi ishte kapur në prill të vitit 2024, gjatë një operacioni policor ndërkombëtar të koduar “Verdikti”, në Itali. Operacioni u zhvillua në bashkëpunim me Departamentin e Policisë Kriminale në Shqipëri, Policinë e Materas dhe institucione të tjera italiane, duke siguruar informacion të saktë dhe koordinim të efektshëm mes palëve.
Ngjarja për të cilën është dënuar shtetasi Gjovalin Lesi ndodhi në vitin 1997, në fshatin Rrasfik, Rubik, ku pas një konflikti për motive të dobëta, ai vrau me armë zjarri kallashnikov motrën dhe bashkëshortin e saj.
Policia e Shtetit rithekson angazhimin për të bashkëpunuar me partnerët ndërkombëtarë, me qëllim kapjen dhe ekstradimin e personave të shpallur në kërkim ndërkombëtar.
