Detaje të reja kanë dalë në dritë lidhur me ekzekutimin e Kristian Markut alias Kristi Bardhit në autostradën Levan-Vlorë. 10 ditë para se të ekzekutohej ai kishte marrë makinë me qira. Fillimisht e kishte marrë për 3 ditë dhe më pas kishte vendosur ta mbante dhe disa ditë të tjera, sipas dëshmisë së pronarit të pikës së makinave me qira. Me këtë automjet ai ka udhëtuar drejt Rrëshenit dhe prej andej në Tiranë bashkë me bashkëshorten, ku ka qëndruar në një banesë të marrë me qira ditore. Ditën e vrasjes i ka thënë gruas se do te udhëtonte drejt Vlorës, por pa dhënë detaje se për çfarë arsye apo kë do të takonte. Në mbrëmje ai u ekzekutua. Xhaxhai i Kristian Markut i tha policisë se nipi ruhej pasi kishte frikë për jetën. Ai ka deklaruar se i vetmi konflikt që ata kishin ishte ai me familjen Reçi në Rreshën.
Kristian Marku u qëllua me breshëri plumbash në afërsi të fshatit Novoselë. Autorët dyshohet se kanë informacion të saktë për lëvizjet e tij për shkak se targat që përdorën në vrasje i kishin vjedhur një ditë më parë në Vlorë, makinës së një oficeri policie. Ata e dogjën makinën pas krimit, por brenda automjetit nuk u gjetën armët me të cilat qëlluan Markun.
Kristian Marku është nipi i Martin Bardhit alias Markut që u ekzekutua në Rrëshen pak ditë pasi ishte liruar nga burgu pasi dyshohej për një atentat të dështuar ndaj Saimir Reçit, nipit të Kastriot Reçit që u ekzekutua me snajper në mes të Rrëshenit.
