Besimtarët e krishterë në mbarë botën kremtuan këtë të diel Ditën e Larit, një nga momentet më të rëndësishme të kalendarit katolik që shënon fillimin e Javës së Shenjtë dhe përgatitjen për Pashkën, që këtë vit festohet më 20 prill.
Në Filipine, mijëra besimtarë u mblodhën në Kishën Santa Ana në Manila, duke mbajtur degë palme në duar si simbol të përulësisë dhe paqes, për të marrë bekimin e priftërinjve. Për shumë prej tyre, kjo është një traditë e trashëguar brez pas brezi.
Festa u kremtua gjithashtu në Itali, Spanjë dhe Poloni, ku traditat ndryshojnë sipas zakoneve lokale – nga shpërndarja e palmave të bekuara në kishat italiane, tek garat për palmat më të bukura në qytetet polake, apo tharja e gjetheve në diell në Spanjë për të simbolizuar pastërtinë shpirtërore.
E Diela e Larit përkujton hyrjen triumfale të Jezusit në Jerusalem, ku ai u prit nga turma që tundnin degë palmash, duke shprehur besimin dhe adhurimin ndaj tij përpara vuajtjeve të mëdha që do të përjetonte gjatë Javës së Shenjtë.
