Arbër Paplekaj, i akuzuar për vrasje e Pjerin Xhuvanit, në Elbasan 4 ditë para zgjedhjeve parlamentare të 25 prillit 2021, përmes avokatit të tij, deklaroi në gjykatën e Apelit të Juridiksionit të Përgjithshëm se reagoi duke qëlluar me armë, kur përpara tij pa dy persona të armatosur dhe një prej miqve të tij, të plagosur.
“Arbër Paplekaj në asnjë moment, nuk ka reaguar me dhunë. Nga pamjet filmike, ai shihet që përpiqet të largohet. Në momentin kur përballë tij ka parë dy persona që kishin armë në duar ai ka reaguar”, deklaroi avokati.
“Nga ekspertimi i teshave të viktimës Pjerin Xhuvani rezulton se ka faktorë plotesues të qitjes me armë zjarri. Për shkak të distancës është e qartë se këto faktorë nuk janë të armës së Arbër Paplekajt. Cka do të thotë që në një distancë më afër se një metër Pjerin Xhuvani ka pasur dikë që ka qëlluar me armë. Në vendngjarje është qëlluar drejt Arbër Paplekajt para se ai të qëllonte. Ai ka vepruar, në mënyrë instiktive në mbrojtje të jetës së tij dhe atyre që kishte pranë”, deklaroi avokati Mirash Martini.
Arbër Paplekaj është dënuar me 22 vite burgim nga gjykata e Elbasanit për akuzën e vrasjes së mjekut psikiatër Pjerin Xhuvani.
Ai e kundërshton dënimin, pasi pretendon se qëlloi me armë për vetëmbrojtje. Më kërkesë të avokatëve, gjykata urdhëroi kryerjen e një akti të ri ekspertimi, që u realizua nga 3 ekspertë.
Në shkallën e parë janë dënuar edhe dy ish-zv.drejtorët e policisë së Elbasanit dhe tetë efektive të repartit Shqiponja, të cilët akuzohen për shpërdorim detyre, pasi ndodheshin në vendngjarje dhe nuk reaguan për ta parandaluar atë.
Prokurori Gent Xholi tha se rihapja e shqyrtimit gjyqësor nuk solli asnjë të re.
“Është e vërtet që ngjarja ka ndodhur në pak sekonda, por unë shikoj provat. Dhe Paplekaj ka qëlluar 7 herë në drejtim të një personi dhe në trupin e viktimës janë gjetur disa plumba, ndërkohë që në drejtim të tij nuk ka pasur të shtëna me armë”, deklaroi prokurori.
Pasi dëgjoi argumentat e palëve, gjykata e mbylli shqyrtimin gjyqësor dhe më datë 1 korrik pritet të shpallë vendimin për të pandehurit.
Vrasja e Pjerin Xhuvanit ndodhi kur në një nga rrugët kryesore të Elbasanit u përplasën grupet e militantëve të Partisë Socialiste e Partisë Demokratike, në kohën që këta të fundit kishin ndaluar automjetin e Mehmet Grecës, i njohur si Met Dafllaku, pasi dyshonin se po blinte vota në favor të maxhorancës.
