Dy vëllezër shqiptarë, Fation dhe Isuf Dauti, janë identifikuar nga Agjencia Kombëtare e Krimit (NCA) në Mbretërinë e Bashkuar si udhëheqës të një rrjeti të madh të organizuar kriminal, i cili merrej me trafik droge dhe kontrabandë njerëzish nga Londra. Pavarësisht se nuk kishin burime të konsiderueshme të ardhurash, ata po jetonin një jetë luksoze, duke përfshirë blerje të shtrenjta, makina sportive, një apartament në Chelsea dhe blerje në Harrods, çka ngriti dyshime dhe çoi në hetime të mëtejshme.
Të dy vëllezërit hynë ilegalisht në Mbretërinë e Bashkuar, por më vonë u ishte dhënë leje e përhershme qëndrimi pasi u martuan me shtetase të BE-së, njëri me një grua nga Letonia dhe tjetri me një grua nga Bullgaria, siç u dëgjua në seancat e Komisionit të Apelit të Imigracionit të Posaçëm (SIAC). Megjithatë, ata tani kanë humbur apelimet kundër vendimeve të Ministrisë së Brendshme që i ndalon ata të kthehen në Mbretërinë e Bashkuar pasi u deportuan në Shqipëri.
Fation Dauti, i cili erdhi në Mbretërinë e Bashkuar në moshën 14 vjeçare, kishte marrë qëndrim të përkohshëm në vitin 2012 për shkak të martesës me një shtetase letoneze, dhe qëndrimi i tij u bë i përhershëm në gusht të vitit 2017. Megjithatë, Ministria e Brendshme ia revokoi këtë leje në shtator të vitit 2019, bazuar në informacionet nga NCA, e cila po hetonte rrjetin e tij, por nuk kishte mundur ta akuzonte. Në vitin 2021, një gjykatë e SIAC vendosi të mbështesë vendimin e Ministrisë së Brendshme, duke konfirmuar se Fation Dauti do të përbënte një kërcënim serioz për sigurinë publike nëse do të lejohej të qëndronte në Mbretërinë e Bashkuar.
Në rastin e fundit të përfunduar më 28 gusht 2023, SIAC hodhi poshtë apelin e Isuf Dautit, 32 vjeç, kundër refuzimit të Ministrisë së Brendshme për t'i dhënë leje të përhershme qëndrimi më 13 gusht 2021. Fation Dauti, i njohur gjithashtu si Fation Dautaj, e kishte humbur më herët apelin kundër revokimit të të drejtës së tij për të qëndruar në Mbretërinë e Bashkuar në një seancë të vitit 2021.
NCA pretendon se Fation Dauti ishte i aftë për "dhunë ekstreme" dhe ishte një "anëtar me ndikim" i një rrjeti kriminal shqiptar me bazë në Londër, i përfshirë në importimin e kokainës, prodhimin e kanabisit, kontrabandën e njerëzve dhe pastrimin e parave. Edhe pse Dauti mohoi përfshirjen në krim dhe argumentoi gjatë apelimit se ai thjesht njihte shoqërisht, ose ishte i afërm me disa anëtarë të tjerë të bandës të përmendur në vendim, gjykata vendosi kundër tij. Ndër personat e përmendur ishte edhe kushëriri i tij, Alket Dauti, i cili u arrestua nga oficerët e NCA në qershor 2018 në Penge, Londër Jugore, dy muaj pasi u takua me Fationin, dhe më pas u ekstradua në Belgjikë në janar 2019 për të vuajtur një dënim me 10 vjet për kontrabandë njerëzish.
Falë sfidave ligjore të suksesshme të gazetës Sunday Express në vitin 2021 dhe këtë vit, u lejua publikimi i emrave të të dy vëllezërve, të cilët më parë gëzonin mbrojtje të anonimitetit.
