Detaje të reja kanë dalë në lidhje me atentatin e ndodhur ditën e sotme në zonën e Don Boskos në Tiranë ku mbetën të plagosur dy persona.
Dyshohet se shënjestër në këtë atentat ka qenë Kastriot Elezi i cili rezulton se ka qenë i dënuar për pjesëmarrje në grup kriminal në Itali. 45-vjeçari ka kryer dy vite burg dhe para disa kohësh është kthyer në Shqipëri.
Ndërsa i plagosuri tjetër është 22-vjeçari Ronaldo Metushi që punonte kamerier në lokalin ku u krye atentati. Dyshohet se autori ka qëlluar me pistoletë silenciator, pasi të shtënat nuk janë dëgjuar në zonë.
Në një deklaratë nga vendi i ngjarjes, Vocaj deklaroi se në vendngjarje janë gjetur 7 gëzhoja, ndërsa në makinën e autorëve, e cila u gjet e djegur në Kamëz, u gjet dhe sekuestrua një armë zjarri. Ai u shpreh se dy personat e plagosur ishin të ulur në një kafe kur janë qëlluar me armë zjarri.
Sipas Vocajt, mendohet se autorët kanë qenë tre persona, bashkë me drejtuesin e mjetit dhe kanë qëlluar nga brenda makinës. Po ashtu ai tha se kanë pamjet filmike të kamerave të sigurisë dhe kjo do t’i ndihmojë për të hedhur dritë mbi zbardhjen e kësaj ngjarje të rëndë.
