Gjithçka nisi me një akt të thjeshtë solidariteti. Pas një sulmi islamofob në xhaminë Alma Road në Peterborough, Dan Harris vendosi të shkojë me djalin e tij 12-vjeçar në xhaminë e lagjes për të dërguar një mesazh të qartë: “Nuk jeni vetëm.”
Dan nuk është mysliman. Por ai beson se urrejtja luftohet me prani, me respekt dhe me gjeste konkrete. Kështu, bashkë me Joshua-n, ai hyri në xhami me disa ëmbëlsira të përgatitura në shtëpi.
Ajo vizitë e parë nuk mbeti e vetme. Sot, babë e bir kanë vizituar mbi 60 xhami në mbarë Mbretërinë e Bashkuar, duke shpërndarë ëmbëlsira dhe duke ndërtuar ura mirëkuptimi mes komuniteteve.
Joshua, i cili ka vështirësi në të folur dhe komunikon duke treguar shkronjat në një tatuazh alfabeti në krahun e babait të tij, u bë i njohur si “Joshi Man” pasi një video ku ai shpërndante ëmbëlsira për besimtarët u bë virale. Pamjet e tij, i qetë dhe i buzëqeshur mes njerëzve që e mirëpresin, prekën zemrat e mijëra britanikëve.
Fushata e tyre mori një slogan të thjeshtë, por të fuqishëm: “Don’t hate, bake” — Mos urre, gatuaj ëmbëlsira.
Në një kohë kur lajmet shpesh flasin për ndarje dhe tensione, historia e Joshua-s dëshmon se edhe një gjest i vogël mund të bëhet një lëvizje kombëtare. Ndonjëherë, një tabaka me ëmbëlsira është mënyra më e ëmbël për të thënë se solidariteti është më i fortë se urrejtja.
