Me rastin e fillimit të muajit të shenjtë të Ramazanit, kryetari i qytetit të New York City, Zohran Mamdani, përcolli një mesazh urimi për komunitetin mysliman, duke theksuar rëndësinë e këtij muaji për reflektim, solidaritet dhe angazhim qytetar.
Gjatë një prononcimi për media, Mamdani u shpreh se Ramazani është muaji i tij i preferuar gjatë vitit. I pyetur se si ndihej në ditën e parë të agjërimit, ai u përgjigj me humor: “Aktualisht ndihem mjaft i etur”, duke theksuar megjithatë dimensionin e thellë shpirtëror që mbart kjo periudhë.
Kryetari theksoi se Ramazani shpesh perceptohet vetëm si periudhë e ndalimit të ushqimit dhe pijes nga agimi deri në perëndim të diellit, por sipas tij, ky muaj përfaqëson shumë më tepër. “Është një kohë për reflektim personal, për të ndihmuar të tjerët dhe për përmirësim shpirtëror”, deklaroi ai.
Mamdani bëri të ditur se pret të marrë pjesë në iftare dhe në aktivitete vullnetare së bashku me anëtarët e komunitetit mysliman, duke vlerësuar përkushtimin e tyre gjatë kësaj periudhe. Ai përmendi sakrificat e përditshme të besimtarëve, nga zgjimi herët për syfyr para punës, deri te angazhimet e mbrëmjes dhe çastet e iftarit.
Sipas të dhënave të Institutit për Politikë Sociale, mbi 20 për qind e myslimanëve në Shtetet e Bashkuara jetojnë në New York, çka e bën qytetin një qendër të rëndësishme për këtë komunitet. Kryetari nënvizoi se takimet dhe aktivitetet gjatë Ramazanit i japin mundësinë të kuptojë më mirë nevojat dhe përditshmërinë e bashkëqytetarëve të tij myslimanë.
Në përmbyllje, Mamdani shprehu shpresën që ky muaj të sjellë paqe, reflektim dhe frymë bashkëpunimi për të gjithë qytetarët, duke theksuar se Ramazani përfaqëson një mundësi për të forcuar solidaritetin dhe kontributin pozitiv në shoqëri.
