Lajmet për një largim të trupave amerikane nga Katari kanë krijuar konfuzion, por deri tani nuk ka asnjë vendim nga Doha për të dëbuar ushtrinë amerikane nga territori i saj.
Sipas raportimeve ndërkombëtare, bëhet fjalë për një zhvendosje të përkohshme të një pjese të personelit dhe pajisjeve amerikane nga baza ajrore Al-Udeid, e cila ndodhet pranë kryeqytetit Doha. Masa është marrë nga Pentagoni për arsye sigurie, për shkak të tensioneve të rritura në Lindjen e Mesme dhe frikës nga sulme të mundshme të lidhura me Iranin.
Autoritetet e Katarit kanë bërë të ditur se lëvizja është thjesht një masë parandaluese, ndërsa bashkëpunimi ushtarak me SHBA mbetet i pandryshuar.
Baza Al-Udeid konsiderohet instalimi më i madh ushtarak amerikan në Lindjen e Mesme dhe shërben si qendra kryesore e operacioneve ajrore të SHBA në rajon. Ajo strehon mijëra ushtarë dhe ka një rol kyç në operacionet në Lindjen e Mesme.
Në këtë kontekst, zhvendosja e një pjese të personelit interpretohet si një manovër taktike sigurie, dhe jo si një vendim politik i Katarit për të larguar praninë ushtarake amerikane.
