Billboard, faqja prestigjioze e renditjeve muzikore, ka shpallur Beyoncé-n si yllin më të madh të muzikës pop të shekullit 21, bazuar në 25 vite ndikimi, evolucioni dhe inovacioni.
“Beyoncé kryeson listën tonë të përzgjedhur nga stafi, falë ndikimit të saj të jashtëzakonshëm, angazhimit për ekselencë dhe aftësisë për t’u rikrijuar,” tha Andrew Unterberger nga Billboard.
Në analizën e tyre, Billboard thekson se statusi i saj si artistja më e vlerësuar me Grammy – me një rekord prej 32 çmimesh – dhe aftësia për të ngritur standardet e muzikës pop, e bëjnë atë një ikonë të pakrahasueshme. Albumi i saj i fundit, Cowboy Carter, i publikuar në vitin 2024, ka marrë 11 nominime për Grammy, duke rritur pritshmëritë për më shumë trofe në janar.
Beyoncé ka një histori të gjatë suksesesh në renditjet e Billboard. Ajo ka 9 këngë që kanë arritur në vendin e parë dhe 24 këngë në top 10 të Billboard Hot 100. Po ashtu, 8 albume të saj kanë kryesuar Billboard 200, duke nisur nga debutimi i saj solo më 2003 me albumin Dangerously In Love. Përpara kësaj, ajo dominoi skenën muzikore si pjesë e grupit Destiny’s Child.
Në renditjen e Billboard për 25 artistët më të mirë të pop-it që nga viti 2000, Beyoncé kryeson, e ndjekur nga Taylor Swift në vendin e dytë dhe Rihanna në të tretin. Në top 10 renditen gjithashtu Adele, Ariana Grande, Justin Bieber, Kanye West, Britney Spears, Lady Gaga dhe Drake.
Në vendin e 25 është Katy Perry, ndërsa artistë të tjerë si Bad Bunny, The Weeknd, One Direction, Miley Cyrus, Eminem, Usher dhe të tjerë janë pozicionuar ndërmjet tyre.
Billboard e konsideron këtë listë si një përmbledhje të artistëve që kanë “përkufizuar madhështinë e pop-it” dhe kanë shënuar epokën e tyre që nga fillimi i mijëvjeçarit.
