Policia greke ka dalë zyrtarisht me një deklaratë për shtyp pas arrestimit të dy shqiptarëve të dyshuar si vrasës me pagesë dhe autorë të vrasjes së 47-vjeçarit Irakli Davella dhe plagosjes së 46-vjeçarit Edi Lulo, alias Etmond Hysa, më 15 dhjetor 2024 në Thermomakedones të Athinës. Zyrtarisht, policia greke ka pranuar se në ngjarjen e rëndë mbeti i plagosur edhe një shtetas i tretë shqiptar.
Sipas policisë, operacioni i djeshëm u zhvillua në zonat “Peristeri” dhe “Nea Smyrni” të Athinës, duke çuar në arrestimin e shtetasve Jenis Tulja, 44 vjeç, nga Tirana dhe Mirjan Guveli, 45 vjeç, nga Saranda. Ata akuzohen për veprat penale: “organizatë kriminale”, “vrasje”, “armëmbajtje pa leje”, “falsifikim” dhe “mbajtje lëndësh narkotike”.
Detajet e ngjarjes Sipas policisë, mesditën e së dielës, më 15 dhjetor 2024, të dyshuarit iu afruan tre personave që po ecnin në këmbë dhe qëlluan drejt tyre, duke shkaktuar vdekjen e 47-vjeçarit Irakli Davella nga fshati Mesopotam i Finiqit dhe plagosjen e dy të tjerëve, njëri prej të cilëve është identifikuar si 46-vjeçari Edi Lulo alias Etmond Hysa nga Puka. Më pas, autorët u larguan nga vendngjarja me një automjet.
Pas mbledhjes dhe vlerësimit të materialeve hetimore, automjeti i përdorur gjatë krimit u gjet i parkuar në zonën “Nea Smyrni”. Sipas hetimeve, të dyshuarit përdorën gjithsej katër automjete për realizimin e krimit, duke lëvizur në mënyrë zinxhir nga njëri mjet në tjetrin, për të shmangur identifikimin.
Për të mos u zbuluar, autorët ndryshuan targat e automjetit që përdorën për t’iu afruar viktimave, e parkuan në vende të ndryshme dhe i monitoruan rregullisht viktimat duke mbajtur një profil të ulët dhe duke mos treguar identitetin e tyre të vërtetë gjatë marrëveshjes për qiradhënie.
Sekuestrimet gjatë arrestimit Gjatë kontrolleve në banesat e të dyshuarve u gjetën dhe sekuestruan:
Dy armë zjarri “Kallashnikov”, një armë zjarri “Scorpion”, dy jelekë antiplumb, 118 fishekë, 6 karikatorë, 3 silenciatorë dhe një pajisje Taser.
Pranga, tre thika, një pajisje portative GPS, 6 gramë marihuanë, celularë, karta SIM, një dron dhe dylbi.
Pesë automjete, një çelës automjeti dhe 79,500 euro.
Hetimet po vijojnë për të zbardhur të gjithë rrjetin kriminal dhe përfshirjen e mundshme të personave të tjerë.
