Kryetari i PD, Sali Berisha, në konferencën për mediat ka komentuar arrestimin e Erion Veliajt, duke dhënë deklarata paksa kontradiktore pasi njëherë kritikoi prokurorët e SPAK për mënyrën e hetimit, më pas vlerësoi për punën e guximshme.
Berisha si fillim tha se ndaj Veliajt nuk u bë asnjë hetim për inceneratorin e Tiranës. Ndërsa më tej tha se ka prokurorë të ndershëm dhe të guximshëm që zbatojnë ligjin.
“Mes prokurorëve të SPAK ka njerëz kurajoz, të ndershëm, që zbatojnë dhe janë të gatshëm që zbatojnë të ligjin. Por absolutisht ka edhe njerëz që përdorin dosjet për të manipuluar prova, për të shfajësuar kriminelë dhe unë kam folur me fakte. Kur them se SPAK është organizatë kriminale, unë nuk nënkuptoj se çdo anëtar i SPAK është kriminel. Unë nënkuptoj ata që flenë mbi krimin, që janë marrë peng. Veliaj prsh u arrestua. Ka dhënë leje ndërtimi, atyre që i kanë bërë favore.
Por Veliaj është përgjegjës se ka firmën për djegësin që nuk ekziston. Djegësi është afera më e madhe e Veliajt. Pse duhet ta marrë të barabartë Altin Dumanin me Olsi Dadon, kur Dumani do që të asgjësojë demokracinë? Ishte dhe një xhelat i sigurimit të shtetit, që kishte njerëzit e vet që punonin tek Veliaj. Ky prokuror mori këtë dosje dhe firmosi. Aty i ndan Dumani dosjet, nuk ka kundërshti në këto që them unë. Çdokush që zbaton ligjin, ka respektin tim” - tha Berisha.
Kreu i PD më tej pranoi që nuk i duhej Ramës ky arrestim para zgjedhjeve dhe vetëm në këtë rast, sipas Berishës, prokurorët nuk u komanduan nga Rama.
“Rama sigurisht që e donte të ngrirë para vitit të ri. E donte të hequr qafe. Por duket se nuk bëri dot atë që donte. A është i përshtatshëm për fushatë? Kjo nuk është e përshtatshme për fushatë. Por prapë, ka një problem këtu. Ai nuk do donte kurrë t’ia linte partinë pas zgjedhjeve Erion Veliajt. Pra, unë nuk mund të them se është Edi Rama që në këtë rast e komandoi prokurorinë. Jo, Rama ishte përpara” - tha ai.
Në fund Berisha tha se po të mos ishin protestat e PD para Bashkisë së Tiranës, sot Erion Veliaj do ishte duke rendur drejt kreut të Partisë Socialiste.
